Whakanuitia te reo Māori hei taonga whakahirahira

Me whakanuitia te Wā o te Reo Māori ka tika, kia rongo ai te motu whānui i te reka o te reo, he taonga nā te Atua i tuku iho mai ki ō tātou tīpuna, tae noa mai ki a tātou i ēnei rā.

Koēnei te whakahau a Tākuta Pita Sharples, te Minita Māori, i te tīmatanga o te Wā o te Reo Māori mō tēnei tau.

“He maha ngā taonga a te iwi Māori i tākoha ki ngā iwi katoa kua heke mai ki Aotearoa nei. Ki au, ko tō tātou reo rangatira te tino taonga o ngā mea katoa,” hei tā Tākuta Sharples.

“Mā te rongo i tō tātou reo, ka rongo ai te tangata i te wairua, i te mana o ō tātou tīpuna, me te hōhonutanga, te whānuitanga, te teiteitanga hoki o ā tātou kōrero tuku iho,” hei tāna anō. “Ka mōhio ai te ao, ko wai tātou, nā wai tātou, nō hea tātou, ā, e ahu ana tātou ki hea. Tērā ka kīa, ko tō tātou reo Māori te tino tohu o tō tātou mana Māori motuhake.

“I te tīmatanga o te Wā o te Reo Māori i te tau 1972, ka kawa ngā whakaaro o ētahi mō te reo Māori. E whakapaetia ana, ka rāwa a tauiwi i te whāngaitia ki te reo Māori.

“Ināianei, kua kite te nuinga i te pai o te reo hei kaupapa whakakotahi i ngā iwi o te motu i runga i te whakaaro kotahi, he mea tākoha ki ngā tāngata e hiahia ana ki te ako.

Nō reira kei te mihi au ki ngā tangata, ki ngā whānau, ngā iwi Māori hoki kua pūmau ki te reo rangatira o ō rātou tīpuna. Kei te mihi ki te arohanui o te Māori ki ētahi atu iwi, kei te mihi hoki ki ngā tāngata, iwi kua whakarangatira i te taonga a ō tātou tīpuna, hei reo motuhake o Aotearoa whānui, ‘hei tikitiki mo ō tātou māhunga’.